Кулленхи сунӑмсем

Ҫынсем пӗр-пӗрне е Турра, хӗвеле, ҫӗре т. ыт. калакан сунӑм сӑмахӗсен тӗсӗсем нумай: ыйту-тархаслу, пуҫтай, ӳкӗт, витӗм, хушӑм, хӳхе, пил, пехил, халал, тав, мухтав, тупа ... Вӗсем уйрӑм хальлӗн тӗрлӗ ҫӗрте, тӗрлӗ вӑхӑтра, тӗрлӗ ҫын хушшинне илтӗнеҫҫӗ. Сунӑмсемпе пилсене пурнӑҫри йӑласенчен, пулӑмсенчен уйӑрма ҫук. Ҫынпа кил-йыш хушшинчи пысӑк ӗҫсене пурне те сӑмахпа палӑртса пынӑ. Салтака панӑ — пиллесе янӑ, качча панӑ — пехиллесе янӑ, ача ҫуралнӑ — каллех ыр сунса каланӑ. Ҫавӑнпа пил-пехил сӑмахӗсем ҫав ӗҫсен йӗркисен кӗлли-сӑвапӗсем шутнех кӗреҫҫӗ. Ҫапах та халӑхра ытти чухне те час-часах калакан ырӑ сунӑмсем пур. Вӗсенчен хӑш-пӗрисене кунта кӗртрӗмӗр, ыттисене хӑйсен йӑлисен йышне кӗртнӗ.