Пилсемпе кӗлӗсем

Пил ту! Каҫар! Сантан пулсассӑн, хӗнне-асапне ан пар! Арҫын сӑмах тунӑ пулсан та, арӑм сӑмах тунӑ пулсан та, чиксе килсен сӑмах тунӑ пулсан та, ҫурта айӗнче сӑмах тунӑ пулсан та, хӗрӗхӗшӗнче сӑмах тунӑ пулсан та, ҫиччӗмӗшӗнче сӑмах тунӑ пулсан та, эрне каҫӗнче сӑмах тунӑ пулсан та, пумилккинче сӑмах тунӑ пулсан та, сӑвап ҫурти ҫутнӑ чухне сӑмах тунӑ пулсан та каҫар! Пил ту! Кам сӑмах тунине пӗлместӗп, каҫар!

Вилнисем тытнӑ пулӗ тесен ҫӑва ҫине кайса йӑлӑнса сӑхсӑхса аслашшӗ-асламӑшӗсенчен: «Тӳрлет ачана, чӗрт», — тесе ыйтаҫҫӗ. Вӑт ӑна ак ҫапла тӑваҫҫӗ. Вилӗ юпи ҫине тайӑлса лараҫҫӗ те:

Ах, асатте, асанне! Эсир те пулин ан тивӗр ман ача-пӑчама. Каҫарӑр, тетӗп, сире час асӑнтараймарӑмӑр пулӗ. Ҫилленетӗр-и, тен, каҫарӑр халӗ. Ҫийӗр, ӗҫӗр, ҫакна парам, анчах ан тивӗр ман ачама. Ах, чӗртӗр тархасшӑн.

Тем тӗрлӗ каласа сӑхсӑхса апатсем параҫҫӗ.