Пилсемпе кӗлӗсем

Лаҫпа мунча — чӑваш хуҫалӑхӗнчи нихҫан та пушӑ тӑман вырӑнсем. Мунчара кӗпе-йӗм ҫунӑ, ҫӑвӑннӑ, ҫапӑннӑ, тасалнӑ, ача ҫуратнӑ, улах ларнӑ, ал ӗҫ тунӑ. Мунча мешехи — хӑйне евӗр туй-ҫуй. Унта пилсемпе сунӑмсем, кӗлӗсемпе ӳкӗтсем, шӳтсемпе такмаксем каланӑ. Унта йывӑҫ-курӑк сӗткенӗпе, ҫитмӗл ҫичӗ чечек пылӗпе, тӑварлӑ шывсемпе, сиплӗ пылчӑкпа, шарт-шарт чулпа, така-вӑкӑр тирӗпе сипленнӗ. Кашнинчех ӗҫне кура сӑмахне каланӑ. Вӗсем хушшинче мунча хутса янӑ чухне, хутса кӑларсан, ӑшӑ парсан, ҫӑвӑнма е ҫапӑнма тытӑннӑ тата мунчаран тухнӑ чухне калакан кӗске кӗлӗсем пур.