Пилсемпе кӗлӗсем

Ырӑ вут ама, вырӑнна лар, мамӑк тӳшек саратӑп, мамӑк минтер хуратӑп — вырӑнтах лар, алхасса тухса ан кай. Тутлӑ мунча, сӗтеклӗ мунча пул — пурте кӗрсе савӑнччӑр!

Ку сӑмахсене кӑмакана ҫутнӑ, хӑйӑ хунӑ чух калаҫҫӗ, малтан пӗр кӗтесе пӗр-ик ывӑҫ пек кӗл пуҫтарса хавараҫҫӗ.

Тавтапуҫ, тав, мунча! Мунча чунӗ те кантӑр, пирӗн чун та кантӑр, лартакан чунӗ те кантӑр, хутакан чунӗ те кантӑр. Мунчана — сивви, пире — ӑшши.

Вут ашшӗпе Вут амӑшӗ, вутна-кӑварна чипер сыхлӑр!

Ҫӗр ашшӗ, Ҫӗр амӑшӗ! Инкекрен-синкекрен сирӗр! Ҫӗр ашшӗ, Ҫӗр амӑшӗ! Ҫилӗре чарӑр! Вут ашшӗ, Вут амӑшӗ, вут ачисем! Вутӑра чипер сыхлӑр!

Тӑхӑр вунӑ майра килет, сакӑр вунӑ салтак килет — ҫавсене савӑнмалӑх ӑшши пултӑрах!

Турӑ, ҫырлах; Турӑ, пулӑш. Хӗрӗх вырӑс кӗрет, хӗрӗх майра кӗрет. Пыл пек, ҫу пек пултӑр! Пыйтине пыйтӑ ҫитӗр, шӑркине шӑрка ҫитӗр, тараканне таракан ҫитӗр.

Каҫ выртсан канлӗх пултӑр; ир тӑрсан пӑрҫа пек сиксе тӑма патӑр! Ах, ах, ах!