Пилсемпе кӗлӗсем

Туй тухса кайнӑ чух татах урӑх сӑвӑпа юрӑ пуҫлаҫҫӗ.

Ҫав вӑхӑтра хӗрпе каччи хуҫа арӑмӗпе упӑшки умне пырса чӗркуҫҫи ҫине ларса пуҫҫапаҫҫӗ. Хуҫисем пехиллеҫҫӗ:

Ачам, усал ан пул, усал пулмасан, пӗр-пӗрин саклаҫне кӗрсе пырсан пурӑнӑҫ пулать. Пирӗн пек нумай пурӑнмалла пултӑр. Пирӗн пек нумай ачаллӑ-пӑчаллӑ пулӑр.

Куркапа сӑра ӑсса илеҫҫӗ. Старик парать кин пулассине, карчӑк — качча. Ҫак сӑрана ӗҫсен кайран укҫа параҫҫӗ.

Хӗре «вӑрланӑ» йӗркепе илсе килсен те каччӑ хӗре пӳрте алӑ ҫинче ҫӗклесе кӗрет. Ӑна сак ҫине лартсан ывӑлӗн ашшӗпе амӑшӗ вӗсене тав туса тулли куркана ӗҫеҫҫӗ. Ашшӗ ывӑлне, амӑшӗ хӗрне пил сӑмахӗсем калаҫҫӗ.

Эй, ывӑлӑм! Акӑ ӗнтӗ эсӗ авлантӑн. Сана ӗнтӗ аҫупа аннӳ ятласа ӑс кӳртес ҫук. Хӑна ху астуса пурӑн, ачаллӑ-пӑчаллӑ пулӑр. Арӑмупа килӗштерсе, юратса, хирлешмесӗр, ятлаҫмасӑр пурӑнӑр. Пӗр каласа янӑ сӑмаха тепӗр хут тытмалла мар. Ҫавӑн пекех мӑшӑрлӑха та, пӗр сӑмах татсан, тепӗр хут тавӑрма май килмӗ. Малашне арлӑ-арӑмлӑ чипер пурӑнма тӑрӑшӑр.