Пилсемпе кӗлӗсем

Ҫумӑр чӳк тунӑ чух пӑтӑпа пашалу пӗҫерсе ҫинӗ. Турра пӗр хуран пӑтӑ панӑ, Пӳлӗхҫе тепӗр хуран пӑтӑ панӑ, Турӑ Амӑшне пӗр хуран пӑтӑ панӑ, ыттисене пурне те юсман панӑ.

Тунӑ кӗллӗм кӗлле кӗтӗр, тунӑ кӗллӗм пахаллӑ пултӑр, вырӑнлӑ пултӑр, аҫӑмӗнчен-ҫиҫӗмӗнчен, йывӑр тӑвӑлтан, йывӑр ҫилӗнчен, тип шар килесрен, килес инкексенчен, вӑрӗнчен-хурахӗнчен аякка сир, курайман тӑшмансенчен те аякка сир.

Вара яла кӗрсен кама тӗл пулнӑ, пурне те шыв сапса ҫӳренӗ.

Ҫак ҫерҫи пек ҫӑмӑл этем пултӑр, качча кайма вӑхӑт ҫитнисен килес ҫулччен каймалла пултӑр, авланма ҫитнисен авланмалла пултӑр; ҫамрӑксем ӳсчӗр, ватӑсем ватӑлччӑр, ҫак ҫерҫи ҫӳллӗ вӗҫсен йӗтӗнпе кантӑр ҫӳллӗ пулӗ, ҫӳллӗ вӗҫмесен лутра пулӗ, ҫырлах!

Эй, Турӑ, ҫумӑр учукӗ, Турра валемлӗ пултӑрччӗ. Турра — ҫумӑр учукӗ. Пӗтӗм ялпа ыйтатпӑр ырлӑх-сывлӑх. Пӗр пӗрчӗ акса пин пӗрчӗ парӑсӑнччӗ, ӑшӑлӑхне-тутлӑхне парӑсӑнччӗ, перекетне парӑсӑнччӗ, Турӑран ырлӑх пулинччӗ тесе ыйтатпӑр ӑшӑ кӑмӑлӑмӑрпа. Ырӑ учук, ял-йыша усал ҫӑмӑрунтан, сивӗ пӑрунтан, путкас кӗперӳнтен упрасӑнччӗ, сыхласӑнччӗ. Турра — ҫумӑр учукӗ, ҫырлахтӑр. Аминь.

Ялӑм-йышӑмпа асӑнатӑп. Ырӑ чӳк, кӗлӗ ырӑ вырӑнлӑ пултӑр. Тытни-туни валемлӗ пултӑр. Ҫырлах, ҫумӑр учукӗ. Тӗтӗм шӑршипе Турра ырӑ ҫумӑр учукӗ валемлӗ пултӑр. Эпӗр ыйтни-туни ҫырлахтӑр.