337-мӗш кӗлӗ

Ҫумӑр чӳк тунӑ чух пӑтӑпа пашалу пӗҫерсе ҫинӗ. Турра пӗр хуран пӑтӑ панӑ, Пӳлӗхҫе тепӗр хуран пӑтӑ панӑ, Турӑ Амӑшне пӗр хуран пӑтӑ панӑ, ыттисене пурне те юсман панӑ.

Тунӑ кӗллӗм кӗлле кӗтӗр, тунӑ кӗллӗм пахаллӑ пултӑр, вырӑнлӑ пултӑр, аҫӑмӗнчен-ҫиҫӗмӗнчен, йывӑр тӑвӑлтан, йывӑр ҫилӗнчен, тип шар килесрен, килес инкексенчен, вӑрӗнчен-хурахӗнчен аякка сир, курайман тӑшмансенчен те аякка сир.

Вара яла кӗрсен кама тӗл пулнӑ, пурне те шыв сапса ҫӳренӗ.