Пилсемпе кӗлӗсем

Эй, асаттесем-асаннесем!

Эпир ӗлӗк папайсем каланӑ йӑлапа

Сӗрен хӑваласа ҫӳретпӗр-ха...

Эсир пире хапӑл илетре?

 

Эпир пурте Тӳскел папай йӑлипе

Йӗрке туса ҫӳретпӗр:

Чирлӗ ҫын пулсан —

Чирне хӑваласа кӑларатпӑр,

Хӗрт-сурт писнӗ пулсан —

Ҫавна кӳртетпӗр...

Эсир пире ҫавӑншӑн

Пӗр пилӗк хӗрлӗ ҫӑмарта парӑр;

Пире хисеплесе хапӑл илсен

Турӑ сире тем пек тепӗр

Сӗренччен сывӑ пӑхса усрӗ.

Пӗртен пине ҫиттӗр!

Пӗртен пине ҫиттӗр!

 

Чир-чӗр кайтӑр,

Чир-чӗр кайтӑр!

Турӑ, перекетне пар,

Иксӗлми тивлетне пар!

Эй, хуҫа, килте-и?

Ҫапла-ҫапла ҫӳретпӗр,

Авалхи йӑлана пӑрахмастпӑр,

Ҫӗнӗрен йӑла кӑлармастпӑр.

Турчки ҫине мӗн утланать?

Таракана мӗн ҫиет?

Хӑнкӑлана мӗн ҫиет?

Вун ик кукӑль, пӗр чӗрес сӑра!

Сӗрен те сӗрен тееҫҫӗ,

Ыран та Мункун тееҫҫӗ.

Вун икӗ чӑрӑш пӗр кутран:

Тӑрринчен татас, шан тӑвас,

Ҫурринчен ҫурас, ҫурт тӑвас.

Тӑмана тытрӑм, хуплу турӑм —

Шӑнтарай умне кучченеҫ.

Инке, пире ҫӑмарта пар,

Пире ҫӑмарта памасан

Чӑххусене ҫӑхан тытса кайтӑр.

Инке, пире чӑкӑт пар,

Пире чӑкӑт памасан

ӗнӳ хӗсӗр пултӑр.

Ик ҫӑмарта, пӗр кулач!

Ик ҫӑмарта памасан

Чӑххи куҫӗ питрӗнтӗр.

Пӗрҫи кулач памасан

Кӑмаки ҫӑвар ишӗлтӗр.

……………………………………

Таса мартан тасалас!

Эп чир-чӗре парӑнмас!