Пилсемпе кӗлӗсем

342-мӗш кӗлӗ

Ҫумӑр-мӗн пулмасан ҫумӑр чӳк тунӑ. Ӑна ҫапла ирттернӗ. Ялти ҫамрӑк ачасем ял тӑрӑх ҫӑнӑх, кӗрпе, ҫу, салат, тӑвар пуҫтарнӑ, хӗрарӑмсем сӑра тунӑ, пӑтӑ, юсман пӗҫернӗ. Пурте хатӗрленсе ҫитсен ялӗпе пухӑннӑ. Вара ваттисем малтан ҫапла каласа кӗлтунӑ:

Эй, Туррӑмӑр, пирӗн пӗр Мӑн Турӑ, ма пире ҫиллентӗн, ҫумӑр памарӑн; ҫырмасем, ҫӑлсем типрӗҫ; Сана, Турӑ, сӑра туса асӑнатпӑр: Сана — пылакӗ, пире — йӳҫҫи. Тата мӑн хуранпа пӑтӑ пӗҫерсе паратпӑр-асӑнатпӑр, пирӗн кӗлле хапӑл ту. Акӑ Сана, Турӑ, вӗҫен кайӑк та тархаслать шыва кӗрсе. Ҫырлахах пире, Турӑ, ҫумӑр пар, акӑ ҫакӑн пек шывпа выляма пар пире.