Пилсемпе кӗлӗсем

Телейрен иртекен ҫутӑ тӗнче,

Пирӗнтен те юлӗ ҫак тӗнче...

Асран кайми хаклӑ тӑвансем —

Никӗс тӗппи аслӑ асатте,

Несӗл тӗппи аслӑ анне!

 

Вӗсен мӗнпур ачи-пӑчисем,

Ватӑлнисем, яшла кайнисем!

Сирӗн ятсем пирӗнпе пӗрле,

Сирӗн ырӑ ӗҫсем халӑхпа пӗрле,

Ҫавӑнпа асӑнатпӑр ҫулсерен,

Ҫавӑнпа ыр сунатпӑр кунсерен.

 

Ӗмӗртен иртекен ҫутӑ тӗнче,

Йӑхран-йӑха ан ман, ҫут тӗнче!

Кайӑк-кӗшӗк килет кӗрлесе,

Ватӑ ҫынсен сасси ҫавӑ вӑл.

Шурӑм пуҫӗ тухать кӗрлесе,

Ватӑ ҫынсен сӑнӗ ҫавӑ вӑл.

 

Кайӑк-кӗшӗк кӗр каять те ҫур килет,

Эсӗ пӗр кайсан килес ҫук.

Ҫулҫӑ кӗр тӑкӑнать те ҫур чӗрӗлет,

Эсӗ пӗр такӑнсан тӑрас ҫук.

 

Ятсӑр ялта шур пӳрт лартрӑмӑр,

Чӳречисем умне сат чӗртӗр.

Тӑвансемпе килсен пӗрле ларӑпӑр,

Эпир килессине ан кетӗр.

 

Сат пахчине сар кайӑксем пухӑнчӗҫ,

Эп юратнӑ кайӑк сасси ҫук.

Тӑванӑмсем пӗрле пухӑнчӗҫ,

Хаклӑ тӑван, санӑн сассу ҫук.