Пилсемпе кӗлӗсем

Выльӑх хунама пӑрахсан ӑна ӗрчеме чӑрмантарнӑ усал вӑйсене юмӑҫ илсе пырса хӑваланӑ. Лашасем пӗрин хыҫҫӑн тепри вилсен пӗрне хапха умӗнче кӳлепипех чавса чикнӗ. Выльӑхсене тӗтӗрнӗ, кӗлӗ каланӑ.

Сана, Карта пуҫ, ҫӗнӗ пӑтӑ пӗҫерсе пуҫҫапатпӑр, пирен выльӑхсене те тӳрлет, хунаттар.

Эй, пӗсмӗлле! Ҫырлаха парӑр, Карта кбӗнеҫҫи, Карта тевлечӗ, Карта никӗсӗ, Карта сыхчи, Карта йыш! Ҫуллӑ юсман паратӑп.

Шыва мимӗр чӳклетӗп, виҫ тӗслӗ выльӑх-чӗрлӗхшӗн, ҫырлах! Шыв кутӗнче сӑмах-юмах пулмари, эсӗ сыхласа, эсӗ упра, пӗлни пулӗ, пӗлменни пулӗ, вырӑнлӑ кӗллӗм вырӑна лартӑр, ху киреллине ху ил, айван кӗллӗме хапӑл ту, чӳк, ҫырлах.

Турӑ, мӗнпур ҫемьепе асӑнатӑп, мӗнпур яшка-ҫӑкӑрпа, ырлӑх-сывлӑх парӑсӑнччӗ. Мӗнпур чунӑма синкерӗнтен-сехметӗнтен, усалтан-тӗселтен сыхлӑсӑнччӗ. Ырӑ Турӑ, ырӑ Пӳлӗхҫӗ, ырлӑх-сывлӑх парӑсӑнччӗ. Ырлӑх-сывлӑх ыйтатӑп Санран ӑшӑ кӑмӑлпа, тутлӑ чӗлхемпе. Картиш турри сыхлатӑр, Тӗтӗм шӑршипе Турӑ патне ҫитсе валемлӗ пултӑр. Карта хаярӗ — Турра. Ӑшӑ кӑмӑлпа, тутлӑ чӗлхемпе асӑнатӑп. Выльӑхӑма-чӗрлӗхӗме ырлӑхне-сывлӑхне парӑсӑнччӗ. Ҫапас патакӑнтан, чикес ҫӗҫҫӗнтен, усал ҫӑмӑрӑнтан, усал пӑрӑнтан, путас кӗперӗнтен упрӑсӑнччӗ, сыхлӑсӑнччӗ. Вутра ҫунса тӗтӗм шӑршипе Турра ҫитсе валемлӗ пултӑр. Эпӗр тытни-туни Турра валемлӗ пултӑр. Пурсӑра та сире Турӑ ырлӑх-сывлӑх патӑр.

Лаша турри, Ӗне турри, Сурӑх турри... Ҫырлахӑрсам. Эпир сире пӗтӗм кӑмӑлтан пӗрер лашапа, вӑкӑрпа, такапа чӳк тӑватпӑр. Ҫаксемпе, туррӑмӑрсем, ҫырлахӑрсам. Пире выҫлӑхран, вут-кӑвартан, вӑрӑ-хурахран, ют халӑх килсе пусмӑрласран, ытти инкек-синкертен сыхласа тӑрӑрсам. Ҫак кӳрекен чӳкне ҫырлахӑрсам.