Пилсемпе кӗлӗсем

Вара вӗсем ял тавра ҫаврӑнаҫҫӗ те хаяр пӑрахма каяҫҫӗ. Вӗсем хаярне укӑлчаран тухса виҫ тапхӑр ҫаврӑнаҫҫӗ хӗвеле май. Унтан вара мӑн кӗрӳ урапа ҫинчен анать те пурин тавра утса ҫаврӑнать, виҫӗ тапхӑр ӳксе пуҫҫапать. Пуҫҫапса тӑрсан ҫак сӑмахсене каласа пӗр-икӗ пус укҫа утса хӑварать: «Мӗн пур хаяр хӑт, усал-тӗсел пиртен уйрӑлса кайтӑр, ҫак укҫа уйрӑлса кайнӑ пек», — тет.

Акӑ сире, хаярсем, укҫа паратпӑр. Пире туй тума ан кансӗрлӗр. Пӗр-пӗринпе ан вӑрҫтарӑр! Ут-выльӑх чирлесрен те сыхлӑр! Ырӑ туй туса хӗр илсе килме парӑр!