Пилсемпе кӗлӗсем

Хӗрӗмӗр, пӗчӗкрен пысӑк турӑмӑр. Ваттисен йӑлипе хамӑр ҫемьерен уйӑратпӑр. Хӑв юратса хӑв каятӑн, пире усал ан ту. Мӑшӑрупа тату, юратса пурӑнӑр. Телейлӗ те тулӑхлӑ пулӑр. Ача-пӑчаллӑ, выльӑх-чӗрлӗхлӗ пулӑр. Ватӑсене ан манӑр!

Юратнӑ хӗрӗмӗрпе кӗрӗвӗмӗр, сирӗн малашне пӗрлехи мӑшӑрлӑ пурнӑҫ пуҫланать. Ҫак пурнӑҫра лайӑх, сайлӑ пурӑнса ирттерме тӑрӑшӑр. Пӗр-пӗрне хисеплӗр, ан кӳрентерӗр. Пӗр-пӗрин сӑмахне яланах итлӗр. Виҫ ывӑлпа виҫ хӗр тӑвӑр. Телейлӗ пулӑр, пӗр-пӗрне яланах юратса пурӑнӑр. Кил-ҫуртра чашӑк-тирӗк ҫӗмрӗлесси те пулать. Ҫавӑнпа килти хыпара ял ҫине ан кӑларӑр, ялти хыпара киле ан кӗртӗр.

Пурӑнӑр лайӑх, ӑраскаллӑ пулӑр, ҫуртри сӑмаха юта ан кӑларӑр; ватӑличчен пурӑнӑр, ача-пӑчаллӑ пулӑр, ваттисене хисеплӗр, атте-аннене хисеплӗр.