Пилсемпе кӗлӗсем

— Пирӗн хӑтанӑн хӗрӗх хӑлаҫ картишӗ пур, хӗрӗх хӑлаҫ картишӗнче хӗрӗх юпа, хӗрӗх юпара хӗрӗх ункӑ, хӗрӗх ункӑран пӗр ункине пире лаша кӑкарма памӑн-и? — тет пирӗн кӗрӳ.

— Пиртен тавах, — тет хӑти.

— Пирӗн хӑтан сакӑр кӗтеслӗ пӳрт пур, пӳртӗнче 90 урай хӑми, 90 урай хӑминчен пӗр хӑмине тӑрса канма памӑн-и? — тет пирӗн кӗрӳ.

— Пиртен пил.

— Сакӑр вунӑ саккӑр пур. Сакӑр вунӑ саккинчен пӗр саккине ларса канма памӑн-ши? — тет пирӗн кӗрӳ.

— Пиртен пил, — тет хунӗ.

(...) Хаяр укҫине пӑрахсан хӗр туйӗ патне каяҫҫӗ, кӗнӗ чух мӑн кӗрӳ ҫапла калать:

Сакӑр вунӑ сакӑр хӑмӑнтан пӗр хӑмӑна выляма-кулма парӑсӑнччӗ. Тӑватӑ кӗтесӗнтен пӗр кӗтесӗне ҫиме-ӗҫме парӑсӑнччӗ. Пире аттепе анне уйӑрса ячӗ. Сирӗн аллӑрта тулли курка пулисӗнччӗ, курка сӑри кӑпӑклӑ пулинччӗ, вырӑнсӑрри вырӑнлӑ пулинччӗ. Кӳртетӗр-и, кӳртместӗр-и? Мӗн ӗҫетӗр, мӗн ҫиетӗр? Пире хапӑл тӑватӑр-и?