Пилсемпе кӗлӗсем

Алӑка е чӳречене пӗр шит уҫаҫҫӗ, пурте тухӑҫалла пӑхса кӗлтӑваҫҫӗ.

Эй, тӑвансем, тӑрӑр халӗ ура ҫине, Турра кӗлтӑвар! Эй, пӗсмӗлле, аминь. Ҫӳлти Турӑ, ҫӗрте патша, Сире кӗлтӑватпӑр, лайӑх чӗлхе-ҫӑварӑмпа, таса чунӑмпа, ырӑ кӑмӑлӑмпа; ырлӑх-сывлӑх патӑр, лайӑх ҫынпа паллашма патӑр, ватӑсене курсан пичче темелле пултӑр, ҫамрӑксене курсан шӑллӑм темелле пултӑр, карчӑка курсан асанне темелле пултӑр, ҫамрӑк хӗрсене курсан йӑмӑк темелле пултӑр, ача-пӑчаллӑ пулччӑр, ватӑлса шурӑ ҫӳҫлӗ пуличчен пурӑнмалла пултӑр!

Вара хӗр амӑшӗ кучченеҫе тата-тата кашни кӗтесе хурать: Хӗрт-сурта, кил илемне кӳртсе тӑракан Турра валли. Вара хӑнасем пурте лараҫҫӗ те ӗҫме-ҫиме тытӑнаҫҫӗ. «Йӳҫӗ ӗҫсе тутлӑ калаҫмалла пултӑр», — теҫҫӗ. Хӗр пӳрте кӗрсен ашшӗпе амӑшне пуҫҫапать, ашшӗпе амӑшӗ вӑл вӑхӑтра куркапа сӑра тытса тӑраҫҫӗ, вӗсем сӑрине ӗҫсе тав тӑваҫҫӗ: «Тав сана, хӗрӗм», — теҫҫӗ. Хӗрӗ малтан кӗрсенех вӑтанса куҫҫульпе йӗрет. Ашшӗсем ӑна пехиллесе калаҫҫӗ:

Эй, ачам, пиртен тухнӑ йӑла мар, ваттисенчен тухнӑ йӑла; санӑн пурнӑҫу ырлӑхлӑ-сывлӑхлӑ, вӑрӑм ӗмӗрлӗ, ачаллӑ-пӑчаллӑ пултӑр. Ҫӑкӑрлӑ-тӑварлӑ пул, ырӑ курса пурӑнма тӑрӑш. Эй, ваттисем, пил тӑвӑр! Эпир ӗҫетпӗр, ҫиетпӗр, сирӗн ятӑрсене асӑнатпӑр, кӑмӑлӑра хӑвармастпӑр, шухӑшӑрсенчен шуйланса хӑраса тӑмастпӑр, ҫырлахса пил тӑвӑр.

Хӗрпе кӗрӗве, Турӑ, ан пӑс. Хӗрпе кӗрӗве ҫын халапӗ хыҫҫӑн, Турӑ, ан яр. Ан вӑрҫтар, ан ятлаҫтар, Турӑ, вӗсене. Пӗр кавар, пӗр шутлӑ пурӑнма, Турӑ, пулӑш.