Пилсемпе кӗлӗсем

Уява палӑртса хатӗрленнӗ хуҫа тӑванӗсене, кӳршисене тата мӑчавӑра хӑй патне чӗнет. Вӗсем килнӗ ҫӗре сӗтел ҫине сӑра, эрех, ытти апат-ҫимӗҫ кӑларса лартать.

Килнӗ ҫынсем вырнаҫса пӗтсен мӑчавӑр кил хуҫинчен ҫапла ыйтать:

— Сӑра йӳҫнӗ-и?

— Йӳҫнӗ, йӳҫнӗ! — тет хуҫа.

— Ҫӑмарта хӗретнӗ-и?

— Хӗретнӗ, хӗретнӗ!

Капла каласан мӑчавӑр аллисене ҫапать те вӑрӑммӑн тӑсса ярать:

— Ҫӑ-мар-та, ҫӑ-мар-та!..

Кил хуҫи арӑмӗ вара пӳрте пӗветнӗ ҫӑмартасен тирӗкне йӑтса кӗрет, хӑнасене пӗрер ҫӑмарта салатса парать.

Ҫӑмарта салатса пӗтерсенех мӑчавӑр татах калать:

— Эй, патян, патян!

Хуҫа арӑмӗ хӑнасене сӑра алтӑрӗ тултарса парать. Алтӑр хӑнасене ҫитсе ҫаврӑнсан мӑчавӑр: «Черкке, черкке кирлӗ!» — тесе калать.

Хуҫа пӗрремӗш черккене мӑчавӑра парать те кӗлӗ калама ыйтать. Мӑчавӑр ура ҫине тӑрса хыттӑн кӗлӗ пуҫлать:

Эй, пӗсмелле! Пӗр Турӑ, ан пӑрах! Ырӑ ҫӗр-йыш, ҫырлах! Хуҫа пичке пуҫларӗ сире пуҫҫапмашкӑн. Ан пӑрахӑр! Епле пулин те усрӑр! Уя тухсан уйра перекет парӑр; киле кӗрсен килте перекет парӑр! Ҫак хуҫана, килне-ҫуртне, выльӑхне, ачисене ан пӑрахӑр! Акатуйран акатуя усрӑр! Чӳк, ҫырлах; сана — йӳҫҫи, пире — шерпет.