Пилсемпе кӗлӗсем

Мӑнкун каҫхине пӗр-пӗр киле пуҫтарӑнса сӑра пичӗкине уҫса ҫапла каланӑ:

Тав сана, ташлама, калӑм пичӗки пуҫлатпӑр. Ҫӳлти ҫутӑ Турӑ, санӑн ҫут ҫанталӑку лайӑх пултӑр. Ку ҫыннӑн килти пуянлӑхӗ пурте хуҫан, сана, Пӳлӗх, Хӗрт-сурт, сире асӑнса ӗҫетпӗр.

Пурте курка ҫине сӑра тултарса ӗҫеҫҫӗ те сӗтел ҫине шалт лартаҫҫӗ. Ҫапла пилӗк хутчен ӗҫеҫҫӗ.

Ҫырлах, калӑм пичӗки. Турра асӑнатпӑр хурӑнташсемпе, тӑвансемпе, ҫырлахтар Турра кӳршӗм-аршӑмпа, калӑм пичӗки.

Ял-йышӑмпа, пӗлӗш-тантӑшпа ӗҫсе ҫиме парӑсӑнччӗ, тутлӑш — Турра, йӳҫҫӗш — пире. Ӗҫсе-ҫисе тутлӑ калаҫма парӑсӑнччӗ.

Аминь, Турра.

Калӑм кунӗ. Пичке пуҫлаҫҫӗ, пӑтӑ пӗҫереҫҫӗ пӗр хуран. Чашкӑ ӑшне антаратпӑр та пӗр ватти пӑтӑ тиркине ҫӗклет, виҫ курка сӑрапалан тата виҫҫӗн тытаҫҫӗ, тӑваттӑн пулаҫҫӗ. Ҫырлахтӑр тесе кӗлтӑваҫҫӗ Турра.

Ҫырлах, Турӑ! Турӑ Амӑшӗ, Пӳлӗхҫӗ, Пӳлӗхҫӗ Амӑшӗ, аслӑ Киремет, ҫырлах, Хӗрлӗ ҫыр, Ҫӳрен ыр, ҫырлах, — теҫҫӗ. Хура Тӑванта выртан, ҫырлах! — теҫҫӗ. Пур ҫемьепе выльӑхӑм-чӗрлӗхӗмпе, тыррӑм-пуллӑмпа асӑнатӑп.

Унтан сӑрана ӗҫетпӗр, пуҫҫапатпӑр ватсене, унтан юрласа ӗҫетпӗр, хӗрлӗ ҫӑмарта ҫиетпӗр. Тепӗр кунне вилнисене асӑнса ҫурта ҫутатпӑр, икерчӗ пӗҫерсе ҫиетпӗр, умӗнче пултӑр эпир ҫинисем, тутӑ пулччӑр вилнӗ ҫынсем тесе.

Ҫулталӑк ҫитнӗ йӗркепе. Ҫул ҫаврӑнӑшӗпе. Пур кил-йыша та, Турӑ, сывлӑх пар. Хурӑнташ-ӑрупа. Тепӗр ҫулччен савӑнса ӗҫсе-ҫисе пурӑнмалла пултӑр. Урай тулли путек, сак тулли ача-пӑча пултӑр. Пӗр вӗҫӗ картара та, пӗр вӗҫӗ шывра пултӑр.