Пилсемпе кӗлӗсем

913-мӗш кӗлӗ

Хывас умӗн тӑватӑ ҫурта ҫутаҫҫӗ. Виҫӗ ҫуртине сӗтел умне лартаҫҫӗ, пӗрне, кил ҫурти тесе, алӑк патне лартаҫҫӗ. Пӗр ватти сӗтел хушшине минтер ҫине кӗрсе ларать, ыттисем пурте ура ҫинче тӑраҫҫӗ. Унран вара вӑл ӑшӗнче Турра кӗлтуса икерчӗ хуҫса илет те: «Атте, умӑнта пултӑр, анне, умӑнта пултӑр», — тесе чашӑк ҫине хурать; вара эрехне черкке ҫине ярать те: «Пӗрле ӗҫсе-ҫисе савӑшса кайӑр», — тесе чашӑк ҫине тӑкать; унтан тата сӑрине курка ҫине ярать те: «Ҫын сӑмахӗ хыҫҫӑн ан кайӑр. Эпир сире праҫникрен праҫнике анчах пиллештеретпӗр, эпир сире асӑнатпӑр, эсир пире ан асӑнӑр, пехил туса кайӑр», — тесе ҫав чашӑк ҫинех тӑкать.