Пилсемпе кӗлӗсем

Шурӑм пуҫӗ тухӗ шуралса,

Сан шурӑ сӑнна курас ҫук.

Шурӑмпуҫ тухнине курӑпӑр —

Эсӗ кураймӑн.

 

Хӗрлӗ хӗвел тухӗ хӗрелсе,

Сан хӗрлӗ чӗрейне курас ҫук.

Хӗрлӗ хӗвел тухнине курӑпӑр —

Эсӗ кураймӑн.

 

Ҫуркунне куккук килӗ — авӑтӗ,

Сан сассуна эпир илтес ҫук.

Чӗкеҫ юррине илтӗпӗр —

Эсӗ илтеймӗн.

 

Ҫӗр ҫырли пиҫнӗ чух

Ҫӗр-шывран уйрӑлтӑн

Эпир ҫӗр ҫырли ҫийӗпӗр,

Эсӗ ҫиеймӗн.

 

Хурӑн ҫырли хӗрелнӗ чух

Хурӑнташсенчен уйрӑлтӑн.

Эпир хурӑн ҫырли ҫийӗпӗр —

Эсӗ ҫиеймӗн.

 

Ҫут тӗнчере пурӑнас чух

Пиртен уйрӑлса кайрӑн.

Эпир сыввисем савӑнса ҫӳрӗпӗр,

Эсӗ ҫӳреймӗн.