Пилсемпе кӗлӗсем

Тупӑк умӗнче «сасӑ кӑларни» — хӳхлесе, хурланса каланӑ кӗлӗсемпе юрӑсем. Вӗсене вилнӗ ҫын тӑванӗсем, ятарласа ватӑсем калаҫҫӗ. Мӗнле хӳхлесси хуйхӑ мӗн таран пысӑк е пӗчӗк пулнинчен килет.

Ҫынна пытарнӑ чухне ҫичӗ хут сасӑ кӑлараҫҫӗ: ҫуса тасатнӑ хыҫҫӑн; тупӑка хурсан; кил картине ылсе тухсан; кил хапхи умӗнче; урам хапхи умӗнче; ҫӑва ҫине ҫитсен; шӑтӑк умӗнче. Ҫывӑх тӑванӗсене хаклӑ ҫын вилӗмӗ ҫул тӑршшипех хӳхлеттерет. Ун пек чухне вӗсене чара-чара лӑплантараҫҫӗ.

Йӗп пек ҫӗр ҫурӑлчӗ, йӗп тухрӗ, сан тӗлӗнтӗн кун пӗтрӗ.

Пытарма илсе каяс умӗн каланӑ.

Эс сасӑсӑр ан ҫӳре. Кукку та килӗ, чӗкеҫ те килӗ, эс корамӑн, эпӗр корӑпӑр. Онта сассӑр ан ҫӳре.

Пехил ту, пехил ту, ача-п(ӑ)чана пехил ту! Пехил ту, пехил ту, ҫуртна-йӗрне пехил ту! Куккук сасси те пулӗ, чӗкеҫ сасси те пулӗ, шӑнкӑрчӑ сасси те пулӗ, санӑн сассуна илтес ҫук. Йытӑ сассипе ан ҫӳре.

Пытарнӑ вӑхӑтра каланӑ.

Куккук та килет сассипе, кайӑк та килет сассипе, чӗкеҫ те килет сассипе. Ҫын сассипе ан ҫӳре, йыт сассипе ан ҫӳре. Эпир сана асӑнатпӑр, эсӗ пире ан асӑн. Вӑхӑтлӑ кил те, вӑхӑтлӑ кай. Вӑхӑтсӑр ан ҫӳре.

Тупӑка хурсан сасӑ кӑларнӑ.

Пӳртрен илсе тухиччен юрланӑ.

Пӳртрен илсе тухас умӗн каланӑ.

Йытӑ сассипе ан ҫӳре; куккук сассипе, чӗкеҫ сассипе, автан сассипе ҫӳре. Кил-йыша, ҫурта-йӗре пехил ту, выльӑха-чӗрлӗхе пил ту, тырра-пулла пил ту, яла-йыша пехил ту, пехил ту-у-у!

Килтен илсе тухас умӗн каланӑ.