Пилсемпе кӗлӗсем

83-мӗш кӗлӗ

Ачамсем, хӗрӗмсем! Аслисем каланине хӑлхана чикме вӗренӗр: итлеме йывӑр пулӗ те, пӗлни кирлӗ пуласса ан манӑр. Хушнӑ ӗҫшӗн турткаланса ан тӑрӑр, аҫӑр-аннӗр пултарайми ӗҫ хушмӗ. Ют ҫын пулӑшма ыйтнине илтмӗш пулса ан иртӗр. Ӗҫлени ҫыншӑн пулсан та, вӗренни хӑвӑршӑнах пулать.

Хирӗҫ пыракана салам парӑр, пуҫ тайӑр. Уншӑн пуҫ татӑлса ӳкмест. Шыв ыйтакана тулли курка парӑр. Уншӑн шыв пӗтмест. Ватӑ ҫынна ларма вырӑн туса парӑр. Уншӑн вырӑн пӗтмест.

Ватӑпа вӗтӗрен кулма кулӑр та, хӑвӑр та вӗтӗ пулнине, хӑвӑр та ватӑ пуласса шута илӗр. Юратса кулнӑшӑн сиен пулмасть.