Пилсемпе кӗлӗсем

Шӑпӑрах та шӑпӑр ҫумӑр ҫӑвать, —

Хурӑн айне эпир кайса ларар-и?

Ах, аттеҫӗм, тетпӗр те ай, аннеҫӗм,

Урӑр айне пукан ай лартар-и?

Саватӑр та пулсан ай пусса ларӑр,

Савмастӑр та пулсан ай тапса ярӑр.

Эсирех те ватӑ, ай эпир ҫамрӑк —

Сире пуҫҫапмасӑр ай пуҫ пулмӗ.

Эсир пиллесессӗн те ай ӗмӗрлӗх,

Эсир пиллемесен ай виҫ кунлӑх.

Ах, аттеҫӗм, тетпӗр те ах, аннеҫӗм,

Эсир пире пиллӗрсем ай ӗмӗрлӗх.

Эпирех те пӗр-пӗрне ай юратрӑмӑр

Ӗмӗрлӗхех пӗрле те ай юратупа.