Пилсемпе кӗлӗсем

666-мӗш кӗлӗ

Хӗре пӳлӗмрен аслӑ туя илсе тухсан туй халӑхӗ пехил юрри юрлама тытӑнать:

Юратса пӗрлешетӗр, юратса пурӑнмалла пултӑр. Ӑраскаллӑ пулӑр, вӑрӑм ӗмӗрлӗ пулӑр. Йӗркеллӗ пурӑнӑр: пӗрне-пӗри итлемелле пултӑр, пӗр-пӗрин кӑмӑлне ан татӑр. Ачапчаллӑ пулӑр, йыш пухӑр. Ачӑрсене хисеплесе ӳстерӗр. Кайран ачӑрсем хӑвӑра хисеплӗҫ. Ҫынна ытлашши ан калӑр. Ҫынна ытлашши каласан хӑвӑра та ытлашши калакан пулӗ. Пулӑшу ыйтакана пулӑшу парӑр. Хӳтлӗх шыракана хӳтлӗх парӑр. Иртен-ҫӳрене ырӑ сунса ярӑр. Пыран-килене хисеп туса ярӑр. Килӗштерсе пурӑнӑр. Пӗр ҫӑвартан сурса пурӑнӑр. Хӑвӑрӑнне хӑвӑр пӗлӗр. Ҫын сӑмахӗ хыҫҫӑн ан кайӑр. Эп урӑх пехиллеме пӗлместӗп. Ыттине Турӑ пехиллетӗр.

Пехиллесе пӗтерсен ваттисем хӑйсен куркисене ӗҫсе параҫҫӗ. Вӗсем хыҫҫӑн кӗрӳ ачипе хӗрӗ курка тытаҫҫӗ, вӗсем каллех куркисене ылмаштарса ӗҫеҫҫӗ.