Пилсемпе кӗлӗсем

609-мӗш кӗлӗ

Туя малтан кӗлетре пуҫлаҫҫӗ. Кӗлете тухиччен малтан ашшӗ-амӑшне лартса пуҫҫапаҫҫӗ туй халӑхӗпе, ашшӗсем вара пехиллеҫҫӗ. Каччине калаҫҫӗ: «Ҫав лаша сана, ҫав ӗне сана, ҫав сурӑх, ҫав качака сана, пехил, ачам, пӗрререн пине ҫиттӗр», — теҫҫӗ, Тата калаҫҫӗ:

Пехил, ачам, вӑрман пек пуян пулӑр, хир пек аслӑ пулӑр, ялта ятлӑ пулӑр. Ватта курсан мучей тейӗр, хӑвӑртан аслине пичче, кӗҫӗннине шӑллӑм тейӗр. Утнӑ ҫӗрӗр утма пултӑр, тӑнӑ ҫӗрӗр тӗмӗ пултӑр. Каҫ каҫрах выртӑр та ирхине иртерех тӑрӑр. Ирхи ӗҫ ҫӑмӑл пулать, пехил, ачам.

Ҫапла пехиллесен вара кӗлете тухса туй пуҫлаҫҫӗ.