Пилсемпе кӗлӗсем

480-мӗш кӗлӗ

Тунӑ кӗллӗм кӗлле кӗтӗр, тунӑ кӗллӗм шута кӗтӗр, виҫӗ тӗслӗ выльӑх-чӗрлӗхшӗн, выльӑх-чӗрлӗхе ҫуратманнине ҫуратса пар, ҫуратнине пит алла пар, пӗр вӗҫӗ шыв хӗрринче пултӑр, тепӗр вӗҫӗ картара пултӑр, виҫ тӗслӗ выльӑх-чӗрлӗх виҫ карта тулли пултӑр.

Хурана илсе виҫӗ хут суллать те йӑтса кӗрет. Шыва чӳклеме тепӗр хуран нимӗр пӗҫернӗ. Пӗчӗк чашӑкпа ҫӑл хӗрне нимӗр илсе кайнӑ, виҫӗ кашӑк нимӗр ҫӑла ярса хӑварнӑ, янӑ чух ҫапла каланӑ: «Шыв ашшӗ, шыв амӑшӗ, шыв вутӑш». Киле таврӑнсан ҫав нимӗре ҫисе янӑ.