Пилсемпе кӗлӗсем

457-мӗш кӗлӗ

Малтан ачасем пилеш хулӑ касма каяҫҫӗ. Хуллине касса килсен пурте пӗрле пухӑнса ҫапла юрласа ҫӳреҫҫӗ: «Кӗҫӗр те вирӗм терӗмӗр те, ыран та Мӑнкун тейӗпӗр. Вӑрӑ та карак тееҫҫӗ те, тӳми те ҫухи латти ҫук!»

Ачасем пӳрте кӗрсен ҫапла кӑшкӑраҫҫӗ: «Вирӗм, чир-чӗр кайтӑр!» — тесе хуҫисене ҫапаҫҫӗ.

Пухнӑ кӗрпипе, ҫупа тата ҫӑмартапа пӑтӑ пӗҫереҫҫӗ. Пӑтти пиҫнӗ вӑхӑтра сӑра ӗҫсе шӑпӑрпа ташлаҫҫӗ. Пӑтти пиҫсен вирӗм пуҫӗ калпакне хул хушшине хӗстерсе ҫапла кӗлтӑвать: «Эй, Вирӗм Турӑшӗ, ҫырлах пире. Тепӗр Вирӗмччен тикӗс пурӑнма пар пире!», — тет те ҫиме лараҫҫӗ. Ҫисе тӑрансан ачасем уя хулӑ пӑрахма каяҫҫӗ.