Пилсемпе кӗлӗсем

198-мӗш кӗлӗ

Пӳлӗхҫӗ, Пӳлӗхҫӗ Амӑшӗ! Эпир паянхи кун ачам-пӑчамсемпе, пӗтӗм кил-йыш чунпа хӗпӗртесе, савӑнса сана асӑнса, тав туса тулли пичӗке пуҫлатпӑр.

Эй, Мӑн Турӑ, Мӑн Турӑ Амӑшӗ, Пӳлӗхҫӗ, Пӳлӗхҫӗ Амӑшӗ! Пире илтсе ҫырлах пире. Пӗтӗм кил-йыш чунпа, выльӑх-чӗрлӗхсемпе савӑнса, ырӑ курса пурӑнмалла ту пире. Ҫурт ҫумне ҫурт хушма, мул ҫумне мул хушма, чун ҫумне чун хушма, кил-йышӗпех тӗрӗс-тӗкел пурӑнмалла ту пире. Картари выльӑх-чӗрлӗхсене ӗрчесе хунамалла ту: вӗсене шӑварма кайнӑ чух пӗр вӗҫӗ килти картара, тепӗр вӗҫӗ шыв хӗрринче ҫырмара татти-сыпписӗр пулччӑр, хыҫҫӑн-хыҫҫӑн утчӑр. Уя-хире тухнӑ чух вун сухапа, вун ик сӳрепе тухмалла ту пире.

Эй, Пӳлӗхҫӗ, итле пире. Пирӗн кӗлле хапӑл ту! Хирте ӗҫлени виреллӗ, килте ӗҫлени килӗшӳллӗ, пур ӗҫ те вырӑнлӑ пултӑр, уйри тырӑ лайӑх пултӑр: хӑмӑлӗ хӑмӑш пек, тӑррийӗ пӑрҫа пек. Ӗҫлеме те канлӗ пултӑр.

Статьясем

Шырав

Пайсем

Ҫавӑн пекех пӑхӑр