Пилсемпе кӗлӗсем

162-мӗш кӗлӗ

Чӳк, ҫырлах, ан пӑрах, сана пуҫҫапатпӑр, витӗнетпӗр. Ҫил ашшӗне така паратпӑр: пирӗн ҫине кирлӗшӗн кӑна вӗрсе тӑтӑр. Ҫумӑр паракан Ҫил амӑшне хурпа чӳклетпӗр. Чӳк, ҫырлах, ан пӑрах, эсӗ пире хӗн ан пар, ҫилпеле пӗрле тӗрлӗ усал чир таврашне илсе килсе вӗлерсе ан пӗтер, сана эпир хурпа чӳклетпӗр, акӑ сана хур ҫунатне паратпӑр. Ку хур ҫуначӗпе пӗтӗм чир-чӗрсене аяккалла илсе кай. Чӳк, ҫырлах! Ҫил ашшӗпе амӑшӗ, пире ан пӑрахах. Пирӗн ҫичӗ тӗслӗ тырра-пулла ҫумӑрпа, ҫил-тӑвӑлпа ҫаптарса, ҫӗмӗрсе кайма ан парах!