1146-мӗш кӗлӗ

Уйрӑлса тухнӑ чух тӗп килӗнче пӑтӑ пӗҫереҫҫӗ те икӗ чашӑк ҫине пӑттине антараҫҫӗ. Пӗр чашӑкран пӑттине килӗнче ҫиеҫҫӗ, теприне — ҫӗнӗ пӳртре. Ку пӑтта ватӑ ҫын ҫӗнлет: аслашшӗ е асламӑшӗ. Ҫӗне пӳрте кӗне чух ҫапла каласа кӗреҫҫӗ:

Турӑ лайӑха патӑр. Вырӑнӗнчех ҫӗртӗр, вут-кӑвар ан куртӑр, ҫӑкӑр-яшкаллӑ пултӑр. Килекенсене кӗтсе илӗр, каякансене тӑрантса ярӑр. Сак ҫи тулли ачи-пӑчи пултӑр, урай тулли путек пултӑр. Пирӗн пек ватӑличчен пурӑнӑр. Ҫӑкӑр-яшкаллӑ пулӑр, пыл-ҫуллӑ пулӑр.