Пилсемпе кӗлӗсем

Тырӑ ҫапса пуҫтарсан, йӗтем варрине кӑшӑл туса лартсан малтан сӑвӑр кӗреҫипе хӗвеле хирӗҫ кӑшӑл йӗри-тавра сӑтӑрса ҫаврӑннӑ та хӗвел тухӑҫнелле пӑхса каланӑ:

Кӑшӑлӑн перекетне патӑр, илнӗ ҫӗрте ан иксӗлтӗр, панӑ ҫӗрте ан палӑртӑр, ҫилӗк ҫулне патӑр, тырӑ таса пултӑр.

Эй, Турӑ, перекетне пар. Йӗтеме кӗртсен йӗтем перекетне, пӳлмене кӗртсен пӳлме перекетне пар. Эй, Атте Турӑ, сана валли парне памашкӑн, патша парушӑн, ҫемьепе ӗҫсе-ҫисе савӑнма перекетне пар. Сутас суттӑм хакӗпе кайтӑр, илес тавар йӳнӗпе килтӗр.