Пилсемпе кӗлӗсем

Сухана тухнӑ чухне ҫутӑличчен мунча хутса кӗреҫҫӗ. Ака умӗнхи кӗлле кӗлтӑваҫҫӗ: «Шӑрт кас; тӗрен хӑпарт, янавара хӑват пар. Турӑ, ҫырлах».

Пӑтта ҫисен, вӑрлӑх ҫӑмарти пӗҫерсен сухана тухса каять. Ҫӑмартана вӑрлӑхпа пӗрле тытса ҫӗре сапнӑ чух: «Ҫӑмарта пек тутӑ пултӑр».

Унтан, акса пӗтсен, ҫимӗк умӗнчи юн кун каҫҫен ака туйӗ тӑваҫҫӗ. Килӗрен пӑтӑ, ҫӑмарта, пашалусем, юсмансем пӗҫерсе, ушкӑнпа пӗр хур пӗҫерсе хире тухса чӳклеҫҫӗ. Пӗтерсен, акана лашасем кӳлсе ҫереме пӗр ик-виҫӗ касӑ тӑваҫҫӗ те касӑсем айне пашалу кӑваписене пӑрахаҫҫӗ. Ларса ҫиеҫҫӗ те сӑра ӗҫсе ака туйӗ тӑваҫҫӗ. Вӑл вӑхӑтра ача кӗрешет, ваттисем юрласа ташлаҫҫӗ: «Ака туй, ака туй, ыран тата пире туй — теҫҫӗ.

Турӑ, чипер сухаласа пӗтерме пилле.

Эй, Турӑ, пилле! Чипер пуҫласа чипер пӗтерме пар. Хамӑра та, выльӑхсене те ҫӑмӑллӑхне пар. Ҫӳлтен ҫумӑр антарса пар, ҫӗртен шӑтарса пар. Тӑрри чакан пек, тӗпӗ хӑмӑш пек пултӑр; пӗрчи ҫак ҫӑмарта пек чӑмӑр, кусса каймалла пултӑр, ҫак просвир пек шурӑ пултӑр.