Пилсемпе кӗлӗсем

Вилнӗ ҫынсене юпа уйӑхӗ (октябрь) пӗтнӗ чух кӗркунне кӗр ҫурти тесе хываҫҫӗ. Ӑна сӑра туса, икерчӗ пӗҫерсе, чӑхӑ пусса хываҫҫӗ. Ӑна шӑмат каҫ е тунти каҫ тӑваҫҫӗ. Ӑна алӑк патне ҫурта хываҫҫӗ, килте миҫе вилӗ, ҫавӑн чухлӗ ҫурта ҫутаҫҫӗ. Ҫурта ҫутаҫҫӗ те вара пурте пыра-пыра хываҫҫӗ. Ӑна хывнӑ ҫӗре ӑратнисем пурте пухӑнаҫҫӗ, ӑратнисем те пӗрле тӑваҫҫӗ ӑна. Ак ҫапла хываҫҫӗ:

Эпир сире кӗркунне йӗркипе сӑра туса, эрех илсе, чӑхӑ пусса, икерчӗ пӗҫерсе, пӑтӑ пӗҫерсе хыватпӑр, пил тӑвӑр, чипер вӑхӑтлӑ килсе, вӑхӑтлӑ кайӑр, вӑхӑтсӑр ан ҫӳрӗр; пил тӑвӑр пире, хӗнне-асапне ан парӑр, ак сире пӗрре татса пӑрахни пӗр ут туртӑми пултӑр, сирӗн умра сӗт кӳлли пултӑр, чипер ӗҫӗр-ҫийӗр те — кайӑр.

Пур ҫемйисемпех, пур выльӑх-чӗрлӗхпех хӗнне-асапне ан парӑр.