Пилсемпе кӗлӗсем

Туй пулас умӗн каччӑ ашшӗ хӗр килне тепӗр хут кайса килет, пӗр-пӗр ҫывӑх ҫынна илсе каять. Ӑна «пӑлчав илме кайни» теҫҫӗ. Хӑйсемпе пӗрле кучченеҫ илсе каяҫҫӗ, лерен каллех пыракансем валли парне парса яраҫҫӗ. Таврӑнсан парнене курӑнмалла ҫакса хураҫҫӗ. Парнене куракан каллех парнипе тутине шӑлса калать: «Шурӑ ҫӳҫлӗ пуличчен пурӑнччӑр», — тет. Ун чухне вара туй хӑҫан пулассине, миҫе урапапа миҫе юлан ут пырассине калаҫҫӗ.