Пилсемпе кӗлӗсем

Вӑрман пек пуян пултӑр, уй пек аслӑ пултӑр, Турӑ ырлӑх-сывлӑх патӑр, амӑшне те сывлӑх патӑр.

Кӑвапам, мана анне (апай) кӑвапипе пӗрлештер.

Пӗсмӗлле! Пӗр Турӑ ан пӑрахтӑр! Тетти юлтӑр, какки кайтӑр!

Ача ҫуралсан картишне ҫӑмарта, хӑмла тухса пӑрахнӑ чухне каланӑ.

Квас чӗресӗнчи чуста пек хӑпар. Тьху!

Ҫӑкӑр пӗҫернӗ чухне каланӑ.

Эй, пӗсмӗлле! Тутлӑ ӑшшине пар, чуна канлӗ ыйӑх пар! Пысӑк пул, куштан пул! Пыйтӑ вилтӗр, шӑрки шӑттӑр!

Мунча кӗнӗ чухне каланӑ.

Лӗп шыв юхтӑр ҫӗрелле, ача ӳстӗр ҫӳлелле.

Калпакӗ пӗттӗр — пуҫӗ юлтӑр! Кӗпи ҫӗтӗлтӗр — пуҫӗ юлтӑр!

Кӗпе хуҫи, ан чӗпӗттер: миҫе чӗпӗ — ҫавна пӗлтер!