Пилсемпе кӗлӗсем

Ҫак ачана ҫу хыптаратӑп — ҫу пек ҫемҫе чӗлхеллӗ пултӑр! Ҫак ачана пыл хыптаратӑп — пыл пек тутлӑ чӗлхеллӗ Пултӑр!

Авалхи йӑлапа, паянхи сӑлайпа, аванлӑхна мала яр, начарлӑхна кая яр!

Ҫак ачана эпӗ пиллеместӗп — ҫӳлти ҫӑлтӑр пиллет, ҫак ачана эпӗ пиллеместӗп — ҫӳлти уйӑх пиллет, ҫак ачана эпӗ пиллеместӗп — ҫӳлти хӗвел пиллет. Ҫу хыптарӑп — ҫуллӑ чӗлхе пил сана! Пыл хыптарӑп — пыллӑ чӗлхе пил сана!

Эп ачана пӑсмастӑп, ача ҫине пӑхмастӑп, эп кушака пӑсатӑп, кушак ҫине пӑхатӑп. Тьху!..

Пыл пек пылак чӗлхе туп — ҫын кӑмӑлӗ савӑнтӑр, ҫу пек ҫемҫе чӗлхе туп — ҫын кӑмӑлӗ ҫаврӑнтӑр! Тимӗр пекех ҫирӗп пул — ҫын сӑмахӗ ан виттӗр! Хурҫӑ пекех ҫирӗп пул — ҫын сӑмахӗ ан ҫиттӗр. Пилеш пиҫӗ, пилеш пиҫӗ — пилеш пекех пуласчӗ, ҫирӗк ҫирӗп, ҫирӗк ҫирӗп — ҫирӗк пекех пуласчӗ. Тимӗр пиҫе, тимӗр пиҫе — тимӗр пекех пуласчӗ, хурҫӑ ҫирӗп, хурҫӑ ҫирӗп — хурҫӑ пекех пуласчӗ.