Пилсемпе кӗлӗсем

Хӑш-хӑш ача кӗпеллӗ ҫуралать. Кӗпеллӗ ҫуралнӑ ача питӗ телейлӗ пулать. Кӗпине усрамалла. Пырпа чирленӗ ачана ҫав кӗпепе чӳхесе шыв парсан ача сывалать.

Тин ҫуралнӑ ачана пил панӑ чухне ҫу хыптараҫҫӗ. Асламӑшӗ е ватӑ инкӗшӗ хыптарать. Чӗлхе-ҫӑвар ҫемҫе пултӑр тесе. Пыл пурри пылпа ҫу туса та хыптарнӑ. Ҫу хыптарнӑ чухне асламӑшӗ ачана пил парать. Ӑна кашни хӑй пӗлнӗ пек калать:

Ҫирӗп ӳс, сывлӑхлӑ пул, пысӑк пул, ӑслӑ пул, ӗҫчен пул, аҫу-амуна итле, ӳссен ӗҫ ҫынни пул, аҫу-аму пек ӗҫчен пул.