Пилсемпе кӗлӗсем

Ҫын сӑмахӗ ан виттӗр, ҫилӗпе хаяр ан ҫиттӗр, кӗмӗл кӗвелӗклӗ пул, ҫӑл шывӗ пек ҫӑтӑл пул! Пысӑклан, паттӑрлан, пылчӑкпа ан варалан!

Ӗмӗрлӗ пултӑр, ӑраскаллӑ пултӑр, тивлетлӗ пултӑр, ӳссен хӑвӑра пӑхмалла пултӑр.

— Лайӑх ӳстӗр, чипер пурӑнмалла пултӑр, вӑрӑм ӗмерлӗ пултӑр, ҫӗр ҫула ҫитиччен пурӑнтӑр, ӑнлӑ-пуҫлӑ ҫӳретӗр.

Хӗре. Качча каймалла пултӑр.

Ывӑла. Авланмалла пултӑр, ашшӗ-амӑшне пӑхмалла пултӑр.

Ҫуралнӑ ача начар пулсан, ача виличчен часрах чӑкӑт пуҫлас теҫҫӗ (чӑкӑт пуҫличчен вилнӗ ачана йывӑрлӑх пулать, вилсен тӑвансене курмасть теҫҫӗ). Сывӑ пурӑнсан чӑкӑта пӗр-пӗр ӗҫкӗ-ҫикӗре пуҫлаҫҫӗ. Чӑкӑт тӑваҫҫӗ те кӳрши-аршине апат ҫиме чӗнсе пыраҫҫӗ. Ун чух кирек мӗнле апат пӗҫерме те юрать, анчах пур апатран малтан сар ҫупа пӑтӑ пӗҫермесен юрамасть.