Пилсемпе кӗлӗсем

Ӗҫ пурлӑх-пуянлӑхпа, ҫӗрпе-шывпа, пурнӑҫпа ҫыхӑннӑ чухне тупа сӑмахне ҫӑкӑрпа ҫирӗплетсе каланӑ.

Ҫавра ҫӑкӑра чуптуса, ҫӑкӑр чӗллине касса илнӗ, чӗлӗ татӑкне ҫыртса чӑмланӑ.

Г.Ф. Миллер, нимӗҫ историкӗ, Ҫӗпӗрти Кучум ханлӑхӗпе (1733—1743) тата Хусан кӗпӗрнипе паллашсан пӗр юмӑҫ чӑвашсене причак тыттарни ҫинчен ҫырса хӑварнӑ. Мӑчавӑр-юмӑҫ тӑвар сапнӑ ҫӑкӑр татӑкне ҫӗҫӗ вӗҫне чикнӗ, айӑплӑ тесе тапӑннӑ ҫыннӑн ӑна ҫӑварпа илсе ҫӑтса ямалла пулнӑ.

Ҫӑкӑр татӑкне ҫӑтса ярсан тупа сӑмахне каланӑ.

Эпӗ суятӑп пулсан ҫак ҫӑкӑр-тӑвара урӑх нихҫан та курса астивем мар!

— Караҫӑн хӗрне вӑрласа кайрӗҫ кӗҫӗр.

— Ҫӑкӑр-тӑвар те!

— Ан калаҫ! Ҫӑкӑр-тӑвар, хам куҫпа хам куртӑм!

Ҫӑкӑр сӑмси, илмен эп ӑна!

Ҫӑкӑр-турӑ, курман.

Хам сӑмаха тытаймасан хам умра ҫӑкӑр-тӑвар тытмасӑр пурӑнӑп.

Ей-пух, уйӑх-хӗвел, пылпа кулаҫ, ҫӑкӑр!