Пилсемпе кӗлӗсем

Ӑнтӑхаҫҫӗ: «Тупа та Турӑшӑн» — теҫҫӗ, ҫӗр кӑшлаҫҫӗ, япаласем ҫухалсан приҫҫак тӑваҫҫӗ; уя тухса сӗтел лартаҫҫӗ, ҫӑкӑр хураҫҫӗ, тӑвар лартаҫҫӗ, витрепе шыв лартаҫҫӗ. Халӑх пуҫтарса кашни ҫынна пӗрер патак тыттараҫҫӗ, ҫӑкӑр-тӑвар ҫитереҫҫӗ, куркапа шыв ӗҫтереҫҫӗ. Куна сурӑх ҫӗтсен, така ҫӗтсен тӑваҫҫӗ.

Тупа та Туршӑн! Уйӑхшӑн-хӗвелшӗн! Акӑ пӗлӗтри Турӑ, эпӗ апла туман, эпӗ апла каламан! Эпӗ хам сӑмах ҫине хам тӑмасан, хам ача-пӑчана ан курам! Икӗ аллӑм та типсе лартӑр! Ҫын курмасан та Турӑ курать!

Тупа та Туршӑн! Эпӗ ҫапла туман, эпӗ ӑна илмен, курман! Эй-пух, уйӑх-хӗвел, пылпа кулаҫ, ҫӑкӑр!

Тупа та Туршӑн! Ҫӑкӑр ҫиме хӗвел ан тухтӑр. Ҫавна ан курам.

Тупа та Турӑшӑн, хӗвелшӗн те, уйӑхшӑн та, ҫак чиркӳ хӗрессишӗн те ҫӗр ҫӑтса ятӑр!

Эй-пух! Тупа та Туршӑн, уйӑхшӑн-хӗвелшӗн!

Тупа та Турӑшӑн! Турӑ чунӑма таттӑр!

Тупа та Туршӑн туй халӑх, ӗненмесен тухса пӑхӑр.

Тупа та Туршӑн, пӗлмерӗм.

Туршӑн-хӗвелшӗн! Калаҫҫӗ сана, Туршӑн-хӗвелшӗн те илмен, пӗлместӗп.

Туршӑн-пӳлӗхшӗн те курман. Сана суйса калаҫҫим?

Эп айӑплӑ пулсассӑн, Турӑ тепӗр ҫак вӑхӑта ан ҫитертӗр!

Эп илнӗ пулсассӑн Турӑ шыратӑр.

Патак епле хӑрнӑ, манӑн алӑ, ора ҫанашкал хӑртӑр!

Турӑҫӑм! Илтсемччӗ мана!

Эпӗ вӑрланӑ пулсан манӑн кӗлеткем ҫак тунката пек хӑрса лартӑр, манӑн алӑсемпе урасем ҫакӑ касса пӑрахнӑ юман турачӗсем пек типсе хуҫӑлччӑр; эпӗ айӑплӑ пулсан манӑн ӳтӗм ҫак хура ҫӗр пек пулса вырттӑр!

Манӑн пӗтӗм кил-йыш пӗттӗр, манӑн кил-ҫурт пӗттӗр, алӑкран тухса ҫӳреме тивӗҫлисем алӑкран кутӑн тухмалла пултӑр.

Пӳртри тӗтӗм алӑкран мар, кайри тӗнӗрен тухтӑр. Вут хутса алӑк уҫма алӑ ан юлтӑр!