Пилсемпе кӗлӗсем

Вӑрӑпа, усал ӗҫпе, сутӑнчӑк утӑмпа айӑплама пӑхсан, йӗр ҫав ҫын патне илсе тухсан ӑна халӑх пухӑвне е ваттисен хуралне чӗнтернӗ те Хӗвеле пӑхса тупа тума хушнӑ. Ку тупа пысӑк пӗлтерӗшлӗ пулнӑ, ӑна калакана ӳпкелемесӗрех каҫарнӑ.

Аслӑ Хӗвел! Сан ҫине пӑхса тупа тӑватӑп! Мана усал ӗҫ тунӑ тесе айӑплаҫҫӗ, (ҫавна-ҫавна) вӑрланӑ теҫҫӗ. Эпӗ тытман (вӑрламан).

Хӗвелпе тупа тӑватӑп: курман, вӑрламан! Манра айӑп ҫук! Хӗвеле пӑхса калатӑп: эпӗ тытман, вӑрламан, вараланман. Ҫуттӑм сӳнтӗр. Эпӗ айӑплӑ мар!

Хӗвел пӑхса, уйӑх пӑхса, Тур умне тӑрса каланӑ-и?

Чӑнах-и?! Уйӑх-хӗвел. — Уйӑх-хӗвел, ҫапла!

Хӗвел пур, хӗвел ҫути пур... Эпӗ йӑнӑш турӑм пулсан ман тӗле хӗвел ан тухтӑр, ман куна хӗвел ан ҫутаттӑр!

Хӗвел, илмен эп ӑна. Хӗвел пор!

Мӗн эсӗ ҫын ҫинчен ҫука калаҫса ҫӳрен: эпир хӗрсемпе ун-кун, апла та капла ҫӳренӗ тесе калаҫса ҫӳрен? — Ҫук, Якку. Ах хӗвел! Калаҫман. Ӑна сӑмах вӗҫертнине ху та пӗлен-ҫке!