Пилсемпе кӗлӗсем

Турпас пек ҫӑмӑл, тӗк пек типӗ!

Тӑпри аяла, хам ҫиеле!

Эй, пӗсмелле! Шыв ама, шыв ашшӗ, шыв йышӗ, шыв ачипчи! Ху усална хӑв ил, хам лайӑха хама пар. Мана ан хӑрат, шыва ан турт. Сана пӳ вырӑнне пӳ паратӑп, чун вырӑнне чун паратӑп. Ҫырлахса кай!

Шыв ашшӗ, шыв амӑшӗ, каҫар, хӗн-асап ан пар. Шыври вилесем, эсӗр те каҫарӑр. Вырӑс, тутар вилли, чӑваш вилли, арҫын вилли, хӗрарӑм вилли.

Хӗрӗх те пӗр тӗслӗ шыв, эсӗ ан тыт, ӳслӗке ан ерт, карланка ан ыраттар, каҫса ҫӳренӗ чухне ан хӑрат, эсӗ те, шыв папай, шур сухаллӑ ватӑ карт, эсӗ те, шыв асламӑшӗ, шур ҫӳҫлӗ ват карчӑк, эпир шыв ӑснӑ-тунӑ чухне ан хӑрат.