Пилсемпе кӗлӗсем

680-мӗш кӗлӗ

Эй, Тур, ҫырлах, Мӑн Тур, ҫырлах, Мӑн Тур Амӑш, ҫырлах, Пӳлӗхҫӗ, ҫырлах, Пӳлӗхҫӗ Амӑш, ҫырлах, Хӗрт-сурт, ҫырлах, Хӗрт-сурт Амӑш, ҫырлах.

Эй, тӑрӑр-ха пурте! Тӑххӑрӑн пӗр хӑма ҫине тӑрса ача-пӑча Туррине кӗлтӑвар, кил-йыш-тӑвана йӑваш чунпа тархаслар, илт, ҫырлах!

Ывӑл-хӗр ҫуратакан Турӑ, ывӑл-хӗр варринче усра.

Ҫурт ҫуратакан Турӑ, ҫурт варринче усра. Мул ҫуратакан Турӑ, мул варринче усра. Тырӑ-пулӑ ҫуратакан Турӑ, тырӑ-пулӑ варринче усра.

Хӗвел амӑш, хӗвелпе пӗҫертсе ан яр. Ҫил амӑш, ҫилпе типӗтсе ан яр.

Ту хӗрринчи вак-тӗвек Турӑ, хута кӗр.

Пихампар, ху йыттуна чар, ыр Хӗрт-сурт, ҫырлах.

Эй, ыр хӑтам та, тӑхлачӑм та пур, и-и Макки ывӑлсем те пур.

Халӗ, хӑта, илсе килнӗ сӑрана, мӑн кушил кучченеҫе ӗҫсе-ҫиме пӳрсе пар.