Пилсемпе кӗлӗсем

505-мӗш кӗлӗ

(...) Хӗрт-сурта ҫур ҫӗр тӗлӗнче пӑтӑ пӗҫерсе ҫапла чӳклеҫҫӗ:

Эй, пӗсмӗлле, Хӗрт-сурт, сана асӑнса чӳклетпӗр, кил-йыша ҫӑмӑллӑхне пар, ҫукне пур ту. Килтен ҫилленсе пӑрахса ан кай, мӗн панине ил, чӳк, ҫырлах, аминь.

Ҫапла чӳклесе пӗтерсен кӑмака ҫине хӗрт-сурт валли кашӑкпа пӑтӑ ӑсса ывӑтаҫҫӗ те вара хӑйсем ҫиеҫҫӗ. Ӗҫке-ҫике кайса ӳсӗрӗлсе килсен ҫапла калаҫҫӗ вара: «Тавсье, Хӗрт-сурт, ӗҫсе ӳсӗрӗлсе килтӗм, ан ҫилленех», — теҫҫӗ. Ют ялтан кучченеҫ парса ярсан чӑн малтан хӗрт-сурт валли кӑмака ҫине хуҫса ывӑтаҫҫӗ.