Пилсемпе кӗлӗсем

1166-мӗш кӗлӗ

Иртен ҫул ҫинче илӗртекен ҫимӗҫ нумай. Ҫын пахчинчи ҫимӗҫе ыйтмасӑр татса ан ил.

Пурнан пурнӑҫра астаракан ырлӑх нумай. Ҫын аллинчи ырлӑха ыйтмасӑр ан ил.

Ҫил хӑвалакана астарма йывӑр мар, вӑл кашни хапха умнех пырса тухайрать, кашни уҫӑ алӑкранах кӗрсе каяйрать. Хӑй ҫулӗпе тӗллевлӗ васкакан этем кашни хапхаранах кӗрсе тухмасть, кашни астараканах ал-хапӑл пулмасть. Эсӗ ҫӳрес ҫул ҫинчи ҫӑлкуҫсенчен эсӗ ҫеҫ ӗҫместӗн. Ӑна пӑхса тӑраканӗсем пур. Эсӗ иртес ҫул ҫинчи ҫырласене эсӗ ҫеҫ ҫиместӗн. Вӗсене пӑхса тӑракансем пур. Ҫавна асра тыт та малалла ҫирӗп ут.

Пӗлмен ҫимӗҫе ҫийиччен, пӗлмен шыва ӗҫиччен халӑх ҫӑлӗ патне, ял пахчи патне ҫитме тӑрӑш.